Showing posts with label புத்தக விமர்சனம். Show all posts
Showing posts with label புத்தக விமர்சனம். Show all posts

Saturday, June 20, 2020

துர்கா மாதா - விமர்சனம்

துர்கா மாதா - விமர்சனம்

 

2016-இல் “என்னில் உணர்ந்தவை” என்ற வலைப்பூ எனக்கு அறிமுகமானது. என்னில் உணர்ந்தவை, எனக்குள் உணர்த்தியவை அனேகம். 

ஜீவா என்ற மிகச் சிறந்த எழுத்தாளர் காயத்ரி என்ற புனைபெயரில் எழுதும் அற்புதமான வலைப்பூ. இன்னும் சொல்லப் போனால், இதை வலைப்பூ என்பதைவிட வலைப்புயல் என்று கூறுவதே பொருத்தமாக இருக்கும். 

ஏனெனில், தன் சீர்மிகு எழுத்துக்களாலும் கருத்துகளாலும் நம் மனதில் ஆற்றல் மிக்க எண்ண அலைகளைக் கிளப்புபவர். தன் பெண்ணிய சிந்தனைகளை  அழுத்தமாகவும், அதே சமயம் எதார்த்தத்தை மீறாமலும் பதிவு செய்பவர். 

ச்சீ என்று இந்த உலகம் பேசத் தயங்கும் / ஒதுக்கும் விஷயங்களைக்கூட, தைரியமாக அணுகி, தன் அழகான எழுத்தின் மூலம் முறையான புரிதலையும் விழிப்புணர்வையும் எற்படுத்துபவர். 

இவர் “தற்கொலைக் கடிதம்” என்கிற சிறுகதைத் தொகுப்பும், “தப்பித்தலென்பது வாய்க்கப் போவதில்லை” என்கிற கவிதைத் தொகுப்பும் எழுதியுள்ளார். இவரது படைப்புகள் மிக ஆழமானவை. 

இதுவரை, இவர் “துர்காமாதா” மற்றும் “ஈஸ்வரன்கள்” என்ற இரண்டு நாவல்கள் எழுதியுள்ளார். இவரது முதல் நாவலான துர்காமாதாவிற்கு விமர்சனம் எழுதும் சிறந்த வாய்ப்பு சென்ற ஆண்டு எனக்குக் கிட்டியது. இதோ அந்த விமர்சனம்:

 

துர்கா மாதா - விமர்சனம்

 

நூல் ஆரம்பத்திலிருந்தே [ஒரு சில வார்த்தைகள்] சுவாரசியத்தையும் ஆர்வத்தையும் தூண்டுகிறது. கூடவே இழையோடும் வலிகளும் துயரங்களும் விரைவில் இதற்கெல்லாம் ஒரு தீர்வு வராதா! என்ற ஏக்கத்தையும் தோற்றுவிக்கிறது. 

கதையின் ஆரம்பத்தில் வரும் சிறுமி மலர் குறித்த காட்சிகளிலேயே, மலரையொத்த பெண்களும் சிறுமிகளும் கறுக்கி / கசக்கி போடப்படும் அவலத்தை நம் கண் முன்னே நிறுத்தி, இக்கதை கையாளப் போகும் கருவை மெதுவாய் நமக்குள் விளக்கும் / விதைக்கும் வித்தை சிறப்பு. 

முதலில் ஒரு கோணத்தில் தொடங்கி பயணித்து, பின்னர் அதை முக்கிய இடத்தில் நிறுத்திவிட்டு, மற்றொரு கோணத்திலிருந்து கதையை விளக்கி முடிச்சுக்களை அவிழ்த்திருக்கும் விதம் சுவையாக இருந்தது. இக்கதையின் நாயகியான துர்கா, பெண்களின் திடமான ஆளுமைக்கு ஒரு மிகச் சிறந்த உதாரணம். 

இன்னும் சொல்ல வேண்டுமென்றால், தொட்டதற்கெல்லாம் கோபப்படும், அழுதுவிடும், இன்னும் இத்யாதி இத்யாதி இயல்புகளையெல்லாம் கொண்டிருக்கும் பெண்களிலிருந்து இவள் நிரம்பவே மாறுபட்டவள். 

தனக்கு ஆசுவாசம் தேவைப்பட்டதால் பாபுவைப் பற்றிச் சொல்லுவது, கழிவறைக்குச் சென்று வந்த பிறகு தன் வலியை, உதட்டை அழுத்தி அடக்கிக் கொள்வது போன்ற இடங்களில் துர்காவின் தன்னம்பிக்கையும் மன தைரியமும் பயங்கரமாய் வெளிப்படுகிறது. 

சீருடையைக் களைவதே தான் நிர்வாணமாக இருப்பதாக நினைக்குமளவிற்கு உணர்வுபூர்வமாய், தான் நேசித்த இயக்கத்தையே போதிய விளைவுகளை ஏற்படுத்தாத காரணத்தால் அதிலுள்ள குறைகளையும் பகிரங்கமாய்ச் சுட்டிக் காட்டிவிட்டு வெளியேறுவதும், தன் மேலாளரை நயமாய் கேன்டீனுக்கு அழைத்து தண்டிக்கும் இடத்திலும் துர்கா எந்த அளவிற்குத் தான் தீர்க்கமானவள் என்றும், உடனடி விளைவுகளை விரும்புபவள் என்றும் புலப்படுத்துகிறாள். துர்கா மட்டுமின்றி, சுடரும், நிஷாவும் துணிச்சலான பெண்களுக்கு சிறந்த எடுத்துகாட்டாய் விளங்குகிறார்கள். 

கதையின் முதல் சில வரிகளிலேயே, அந்தக் கால ஆணாதிக்கம் பெண்களை வீட்டிலேயே அடைத்து வைத்தது ஆனால், இந்தக் கால ஆணாதிக்கம் பெண்களை வேலைக்கு அனுப்பி சோம்பேறிகளாகவும் சுகபோகமாகவும் வாழ்ந்து கொன்டிருக்கிறது என்ற வித்தியாசத்தைச் சிறப்பாய் உணர்த்தியிருக்கிறார். 

கதாபாத்திர அமைப்பும் அவர்களின் குணாதிசயங்களும் நம் அன்றாட வாழ்க்கையின் ஏதாவதொரு தருணத்தில் சந்தித்த / சந்திப்பவர்கள் போன்றேயிருப்பதால் கதை மனதிற்கு இன்னும் நெருக்கமாகிவிடுகிறது. இடையிடையே வரும் ஹிந்தி சொற்களும், வட இந்திய தமிழ் உச்சரிப்புகளும் அந்த மாந்தர்களூடே நம்மையும் உணர்வுபூர்வமாக உலவ விடுகிறது. 

வட இந்தியர்கள், பெட்ஷீட் மற்றும் பாத்திரங்கள் விற்க வந்தால்கூட ஒருவித பயத்துடனேயே அவர்களைப் பார்க்க வைத்த சில திரைப்பட காட்சிகளிலிருந்தும், பல செய்தித்தாள் செய்திகளிலிருந்தும் மாறுபட்டு, அவர்களுக்குப் பின்னால் இருக்கும் வலிகளையும் வேதனைகளையும் சிந்திக்க வைக்கிறது இந்த நாவல். 

முதலாளித்துவ நெருக்கடி மற்றும் ஆளும் வர்க்கங்களின் அதிகார வெறியாட்டம் போன்ற விஷயங்களைப் பட்டவர்த்தனமாய் பேசி, எத்தகைய கிடுக்குப்பிடிகளில் சிக்கிக் கொன்டு நம் சமூகம் முன்னேற முடியாமல் தவித்துக் கொண்டிருக்கிறது என்பதை வெளிச்சம் போட்டுக் காட்டுகிறது இந்நாவல். ஒரு முக்கியமான இடத்தில் [“இவ்ளோ சீரியசானப் பிரச்சினையை உங்க தமிழ்ச்சமூகம் எப்படி பார்க்குது தோழர்?” “தமிழன் உயர்ந்த பண்பாடும் நாகரீகமும் கொண்ட மூத்தக்குடி என்னும் பெருமிதத்தோடுதான்...” டாக்டர் கூச்சத்தோடு சிரித்தார்.] இரண்டே வரிகளில் கலாச்சாரம் பண்பாடு என்ற பொய்ப் பிரச்சாரத்தின் கன்னத்தில் ஓங்கி அறைகிறது இந்தக் கதை. 

அருப்புக் கோட்டை விவகாரம், பொள்ளாச்சி விவகாரம் போன்றவற்றை இக்கதை தொட்டுச் செல்வதாலும் அவற்றிற்கானத் தீர்வுகளைப் பேசுவதாலும் நாவலை வாசிக்கிறோம் என்பதைத் தாண்டி, எதார்த்த உலகில் நாம் சில முக்கிய நண்பர்களோடு இவற்றை விவாதித்துக் கொன்டிருக்கிறோம் என்று உணரவைப்பதில் இந்நாவல் வெற்றி பெற்றிருக்கிறது. 

குட் டச் [Good touch] பேட் டச் [bad touch] போன்ற விஷயங்களை விரிவாகவும் விவேகத்துடனும் பேசுவதால் அனைத்துத் தரப்பினரும் நிச்சயம் படிக்கவேண்டிய நாவல் என்ற தரத்திற்கு உயர்ந்து, இவற்றைக் குறித்த வழக்கமான கற்பிதங்களையும் கருத்து பிம்பங்களையும் உடைத்து, வேறொரு புதிய கோணத்திலும், வித்தியாசமான, சரியான மற்றும் நியாயமான அணுகு முறையைக் கற்பித்து பெரியவர்கள் பெரியவர்களாக இருந்தால் குழந்தைகளும் குழந்தைகளாகவே இருப்பார்கள் என்ற கருத்தை அழகாய் புரியவைப்பதில் இந்நாவல் தனித்து நிற்கிறது. 

உரிமைகள், கடமைகள், வாழ்வியல் போன்ற இத்தியாதிகளில் ஆண்களிடமிருந்து தனித்து நிற்பதோ அல்லது ஆண்களை மிஞ்சி நிற்பதோ அல்ல பெண்ணியம், மாறாக அவர்களுக்குச் சமமாய் / நிகராய் நிற்பதே நிஜமான பெண்ணியம் என்ற கருத்தைத் தரமாய்ப் புரியவைப்பதில் இந்நாவல் உயர்ந்து நிற்கிறது. 

நாவலின் இறுதியில் துர்கா புல்லட்டில் கம்பீரமாக வரும் காட்சி வேட்டைக்கு புறப்பட்ட சாமி குதிரையேறி செல்வதை கண்முன்னே கொண்டுவருகிறது. 

கதை அதிகாலை நேரத்தில் ஒரு துயரக் காட்சியோடு தொடங்கி, ஒரு இரவு வேளையில் மகிழ்ச்சியோடும் துர்காவின் புன்னகையோடும் முடிவடைவதாகச் சித்தரித்திருக்கும் விதம் இந்நாவல் இருட்டில் மறைந்திருக்கிற / மறைக்கப்பட்டிருக்கிற துயரங்களையும் வேதனைகளையும் வெளிச்சத்திற்குக் கொண்டுவந்து, அவற்றிற்கானத் தீர்வையும், இவற்றிற்குக் காரணமானவர்களுக்கே இருளை திருப்பித் தரவேண்டும் என்ற கருத்தை அழகாய் விளக்குகிறது.

இறுதியாகச் சொல்ல வேண்டுமென்றால், துஷ்டர்களை துடைத்தெறிய துரிதமாய்ப் புறப்பட்டால், துன்பங்களைத் துடைக்காமல் துளியும் ஓயமாட்டாள் இந்த துர்கா மாதா. 

***

இப்போது இந்தப் புதினம் நண்பர் நவீன் ஹரி அவர்களின் அழகான ஆங்கில மொழியாக்கத்தில் சிறப்பாக வெளிவந்திருக்கிறது.

It is his special Debut Translated Novel!

இத்தகையச் சிறந்த புதினத்தை அனைவருக்கும் சென்று சேரும் வகையில் ஆங்கிலத்தில் மொழிபெயர்த்த நண்பர் நவீனுக்கு நெஞ்சார்ந்த வாழ்த்துகளும், பாராட்டுகளும் மற்றும் நன்றிகளும்.

அமேசான் கிண்டிலில் தமிழில்

துர்கா மாதா

ஆங்கில மொழிபெயர்ப்பில்

  DURGA MAATHA:The protector of social justice



Wednesday, June 10, 2020

மூன்றாம் நதி - விமர்சனம்


மே 24 2016 செவ்வாய்க்கிழமை; மதிய நேரம் என்னுடைய வழக்கமான அலுவலக வேலைகளை
தூக்கக் கலக்கமாக இருந்ததால் சற்று தள்ளி வைத்துவிட்டு முகநூலில் உலாவலாம் என சென்றேன்.
அங்கு எனக்கு தெரிந்த மிக நெருக்கமான ஒரு அண்ணன் ஆன்லைனில் இருந்ததால் அவருடன் அரட்டை அடித்தேன் [Chatting] அப்போது திடீரென அவர் நாளைக்கு எனக்கு திருமணம்
அவசரமாக முடிவாகிவிட்டது என மிகச் சாதாரணமாக சொன்னார். மிகுந்த அதிர்ச்சியும்
குழப்பமுமாய், திருமணங்கள் கூடவா இப்படி திடீரென நிச்சயிக்கப்படுகின்றன?
என்று நான் குழம்பிக் கொண்டு இருக்கும்போது நண்பர் மகேஷிடம் இருந்து எனக்கு ஒரு தொலைபேசி அழைப்பு; மணிகண்டன் ஒரு புதினம் எழுதுகிறார் என்று.
அத்தனை குழப்பங்களும் அதிர்ச்சிகளும் நீங்கி மகிழ்ச்சியும் ஆச்சரியமும் இன்னும் பல சந்தோஷமான உணர்வுகளும் என்னை ஆட்கொண்டன. என்னது
"நம் மணிகண்டன் நாவல் எழுதுகிறாரா!" என நான் ஆச்சரியத்தில் கேட்டேன்

ஏனென்றால் 2016 ஆரம்பத்தில் நண்பர் மகேஷ் மூலமாக எனக்கு வா. மணிகண்டன் அவர்களும் அவரது நிசப்தம்
வலைத்தளமும் அறிமுகமானது. அவரது எழுத்துக்களும் பதிவுகளும் மிக நேர்த்தியாகவும், அழகாகவும், அழுத்தமாகவும் ஆழமானதாகவும் இருக்கும். அது மட்டுமின்றி அவருடைய
பதிவுகளையும் தளத்தையும் தொடர்ந்து பார்வையிட்டு அதில் நிசப்தம் அறக்கட்டளை பற்றியும்
தெரிந்து கொண்டேன். உண்மையிலேயே மணிகண்டனின் வெளிப்படைத்தன்மையும்,
நேர்மையான அணுகுமுறைகளும் எளிமையான வாழ்வும் அவரை எவ்வளவு தூரம் உயர்த்தி இருக்கிறது என்பதை புரிந்து கொண்டு நானும் அவருடைய எழுத்துக்கு ஒரு மிகப்பெரிய
ரசிகன் ஆனேன்.

இந்நிலையில்தான் நண்பர் மகேஷ் அவர் ஒரு நாவல் எழுதுகிறார் என்று சொன்னதும் ஆச்சரியத்தில் என் மனம் நிரம்பியது. அதுமட்டுமின்றி நண்பர் மகேஷ் "ஏன் நாம் இதை
படித்துவிட்டுக் கருத்துக்களை கூறக்கூடாது? விமர்சனங்களை எழுதினால் அவரும் சந்தோஷப்படுவார்." என கூறினார். எனக்கு மிகுந்த உற்சாகம்! நிச்சயமாக செய்ய வேண்டும் என்ற ஆர்வத்துடன் அவரிடம் உடனே அனுப்பும்படி கேட்டேன். நண்பர் மகேஷ் ஒலி கோப்பாக மாற்றப்பட்ட அந்த நாவலை எனக்கு மின்னஞ்சல் செய்திருந்தார். ஆனால் அன்று என்னுடைய அலுவலக நேரம் முடிந்து விட்டதால், வீட்டிற்கு சென்றுவிட்டேன் எனது வீட்டில் போதிய இணைய வசதி அப்போது கிடையாது. ஆனால் மாலை, நண்பர் மகேஷ் என்னை அழைத்து, "விமர்சனத்தை முடித்து விட்டாயா?" எனக்கேட்டார்
இன்னும் ஆரம்பிக்கவே இல்லை என்றேன். ஆனால் அவர் சொன்ன விஷயம் பலர் இப்போது அந்த ஒலி கோப்புகளை தரவிறக்கம் செய்து கேட்க ஆரம்பித்துவிட்டார்கள் பலர் மிகுந்த ஆச்சரியத்திலும் பதட்டத்திலும் இருக்கிறார்கள் என்று கூறினார். அதாவது படம் ரிலீஸ் ஆவதற்கு முன்பே பார்க்க வாய்ப்புக் கிடைத்தால் எப்படியிருக்குமோ அந்தமாதிரி.
ஆனால் சோகம் என்னவெனில் அன்று மாலை என் உடல்நிலை கொஞ்சம்கொஞ்சமாக மோசமாக தொடங்கியது. அடுத்த நாள் நான்
அலுவலகம் சென்றபோது என்னால் சமாளிக்க முடியாத அளவிற்கு உடல் நலக் குறைபாடு. ஜுரம், லேசான தலை வலி, வயிற்று
வலி இப்படியெல்லாம். ஆனாலும் அந்த ஆர்வத்தில் நான் அந்த ஒலிக்கோப்பை கேட்டு விட்டு என்னால் முடிந்தவரை ஒரு சிறு விமர்சனத்தை ஆங்கிலத்தில் தட்டச்சு செய்து அனுப்பி இருந்தேன் ஏனெனில் என்னால் அப்போது தமிழில் தட்டச்சு செய்வதில் எனக்கு சிரமம் இருந்தது எனவே ஆங்கிலத்தில் தட்டச்சு செய்த அந்த சிறு விமர்சனத்தை வா. மணிகண்டன் அவர்களுக்கு அனுப்பிவிட்டு அன்று மாலை வீட்டிற்கு வந்துவிட்டேன். அதற்குப் பிறகு என்னால் சமாளிக்க முடியாத அளவிற்கு
உடல்நிலை மோசமானது. மே 26 இந்த ஆண்டு எந்த தேதியில் நான் எனது பதிவுகளை பதிவிட தொடங்கினேனோ, எந்த தேதியில்
எனது ப்ளாகை லான்ச்  செய்தேனோ அதே தேதியில் நான்கு வருடங்களுக்கு முன் என் உடல்நிலை மோசமான காரணத்தினால் இப்போது எனது ப்ளாக் [Blog] மக்களிடம் பரவிக் கொண்டிருப்பது போல் என் ரத்தத்தில் ட்ரிப்ஸ் ஏறி பரவிக்கொண்டிருந்தது. உடம்பின் நீற்ச் சத்து குறைந்துபோய்விட்டதாம். ஆனால் மே 27 காலை மகேஷ்
என்னை அழைத்து "நிசப்தம் பார்த்தாயா?" எனக்கேட்டார் நான் இல்லை எனச் சோர்வாக பதில் சொன்னேன். உனக்கு ஒரு ஆச்சரியம் காத்திருக்கிறது பாரு என கட்டளையிட்டார் அவரது காலை கட் செய்துவிட்டு நிசப்தத்தை
பார்வையிட்டேன் எனது அலைபேசியின் இணையம் மூலமாக. அப்போது நான் அனுப்பியிருந்த விமர்சனத்தையும்
தமிழில் மொழிபெயர்த்து அவருடைய இணையத்தில் வெளியிட்டு இருந்தார்.
உண்மையிலேயே உடல் நல குறைபாடுகள் எல்லாம் மறந்து என் ரத்தத்தில் புது உற்சாகம் பரவியது. என் விமர்சனமும்
அங்கீகரிக்கப்பட்டிருக்கிறதா! என்ற உணர்வே எல்லா உடல்நலக் குறைகளையும் மறக்கச் செய்து என்னை புது மனிதனாக மாற்றியது. யோசித்துப் பாருங்கள் நீங்கள் தினமும் பார்க்கும் ஒரு சுவாரசியமான தொலைக்காட்சி நிகழ்ச்சியில் திடீரென உங்களைப் பற்றி செய்திவந்தால்? திடீரென்று உங்கள் முகம் திரையிடப்பட்டால்? ஆனால் என் உணர்வுகள் அதற்கும்மேல். அப்படி எனக்கு உற்சாகம்
தந்த அந்த விமர்சனப் பதிவை இங்கே பதிவிடுகிறேன்

***

மூன்றாம் நதி - முதல் விமர்சனம் ~ நிசப்தம்

5/27/2016 09:20:00 AM

வணக்கம்.
நான் அப்செரன் ஃபெர்ணாண்டோ. சென்னையிலிருந்து எழுதுகிறேன். அமேசான் நிறுவனத்தின் மென்பொருள் உருவாக்க மையத்தில் வேலையில் இருக்கிறேன். எனக்கு பார்வை இல்லை. சில மாதங்களுக்கு முன்பாக திருப்பதி மகேஷ் மூலமாக
நிசப்தம் அறிமுகமானது. அன்றைய தினத்திலிருந்து இன்று வரைக்கும் நிசப்தம் வாசிப்பதை வழக்கமாக்கிக்
கொண்டேன். அதன் வழியாக உங்களின் முதல் நாவலும் அதே சமயத்தில் மிகச் சிறந்த நாவலுமான மூன்றாம் நதியின் ஒலி வடிவத்தை அழகான வெகுமதியாகக்
கிடைக்கப்பெற்றிருக்கிறேன் என்றுதான் சொல்ல வேண்டும். நாவலை எங்களுக்கு ஏற்ற வடிவில் வழங்கியதற்காக
மனப்பூர்வமான நன்றி. ஒலிவடிவமானது துல்லியமாகப் புரிந்து கொள்ளுகிற
வகையில் இருக்கிறது.
இத்தகையதொரு முன் முயற்சிக்காக நன்றி. இதை நீங்கள் தொடர வேண்டும்.
ஏனென்றால் உங்களுக்கும் உங்களுடைய எழுத்துக்களுக்காகவும் நாங்கள் இங்கே இருக்கிறோம் என்று உறுதியாகச்
சொல்வேன்.

நாவல் பற்றியதொரு சிறு குறிப்பு :

மூன்றாம் நதி உண்மையிலேயே மனதைத் தொடுகிற நாவலாக இருக்கிறது. நாவல் எங்கு
எப்படித் தொடங்குகிறதோ அங்கு அப்படியே முடிவதை இந்த நாவலில் நான் விரும்பும் அற்புதமான
அம்சமென்று சொல்வேன். உங்களின் கதை சொல்லும் உத்தியானது நேரடியாகவும்
இலக்கியப் பூர்வமாகவும் ஏகப்பட்ட விவரங்களை நாவல் நெடுகவும் அவிழ்க்கிறது. நாவலின் வழியாக
பெங்களூரின் இன்னொரு முகத்தைப் பார்க்க முடிந்தது. தங்களின் அட்டகாசமான
வர்ணனையானது தொண்ணூறுகளின் பெங்களூரை முன்னால் கொண்டு வந்து நிறுத்தியிருக்கிறது.
நவீனத்துக்கும் பழமைக்கும் இடையில் தள்ளாடுகிற தலைமுறையின் கச்சிதமான
உதாரணமாக பவானி இருக்கிறாள். பணத்துக்கும் நிலத்துக்குமான அடிமைத்தனத்தை
பால்காரர் காட்டுகிறார். தனது பழைய காதலைப் பற்றி கணவனிடம் சொல்லுமிடத்தில் ‘சும்மா வெளியே
கூட்டிட்டு போயிருக்கான். முத்தம் கொடுத்திருக்கான். அவ்வளவுதான்’ என்று
பவானி சொல்லுமிடத்தை ரசித்தேன். எதையெல்லாம் கலாச்சாரம் என்று நம்பிக் கொண்டிருக்கிறோமோ அதை
நாகரிகமும் வளர்ச்சியும் வெகு இயல்பாக மென்று துப்பிவிடுகிறது.
Totally மூன்றாம் நதி stream of tears!
நன்றி.
அன்புடன்,
அப்செரன் ஃபெர்ணாண்டோ .

***
அமேசான் கிண்டில்இல் மூன்றாம் நதி வாங்க