Showing posts with label அறிமுகப் பதிவு. Show all posts
Showing posts with label அறிமுகப் பதிவு. Show all posts

Tuesday, May 26, 2020

அறிமுகப் பதிவு



எல்லோருக்கும் வணக்கம்.
நான் அப்சரன் ஃபெர்ணாண்டொ.
பிறந்தது மட்டும் விழுப்புரம் மாவட்டம். மத்தபடி வளர்ந்தது வாழ்றது எல்லாமே சென்னைதான். கொஞ்சநாள் கடலூர்.
அதனாலேயே என்னவோ சென்னைனா அவ்ளோ பிடிக்கும்.
படிச்சது ஆங்கில இலக்கியம், பற்று தமிழ்மேலதான்.
----------
எனக்குனு ஒரு ப்ளாக். நானும் எழுதப் போறேன்!
இந்த ரெண்டு விஷயமும் எனக்கே கொஞ்சம் வியப்பா இருக்கு!
எழுதணும்கிற என்னோட சின்ன ஆசைக்கு ஊக்குவிப்பு [Encouragement] என்கின்ற தீனியைப் போட்டு வளர்த்த என்னோட அன்பான, அக்கறையான மற்றும் முக்கியமான நட்புகள் / உறவுகள்.
அவங்கள பத்தி விரிவா எழுத விரும்பறதால, பெயர்கள குறிப்பிட முடியல. ஆனா இந்தநேரத்துல என் மனசுமுழுக்க நெறைஞ்சிருக்குற அவங்க எல்லோரையும் அன்போடையும் நன்றியோடையும் நெனச்சுக்கிறேன்.
ஆனா சொல்லியே ஆகவேண்டிய ரெண்டு ஆளுமைகள் இருக்காங்க.
இந்த ரெண்டுபேருமே என்னோட வாசிப்புத் திறன் / அனுபவம் மேம்பட மிகமுக்கிய காரணிகள்.
மகேஷ் & ரவிக்குமார் சார்.
2016-ல் பொக்கிஷமா கெடச்சாங்க இந்த ரெண்டுபேரும்.
மகேஷ்: பல புதுப்புது பதிவர்கள் எழுத்தாளர்கள்னு அறிமுகப் படுத்தி, சில புது நூல்களையும் தந்து வாசிக்கவச்சதோடு மட்டுமில்லாம, எனக்குள்ள கொஞ்சமா துளிர்த்திருந்த எழுத்துத் திறமையை வெளியே கொண்டுவந்து, எப்பவும் என்னை எழுத சொல்லிக்கிட்டே / தூண்டிக்கிட்டே இருப்பாரு.
அவரும் சொல்லிச் சொல்லி பாத்து நான் கேட்கலனு புரிஞ்சி, சும்மா பேச்சுவாக்குல ப்ளாகுக்கு என்ன பேரு வைக்கலாம், என்ன தலைப்பு கொடுக்கலாம் அப்படீனு கேட்டு, அவரே ப்ளாகையும் கிரியேட் (Create) பண்ணி கையில கொடுத்து இனிமே ஒழுங்கு மரியாதயா எழுதுன்னு சொல்லிட்டாரு.
புனைப்பெயர்ல எழுதவானு நான் கேட்க, சொந்த பெயர்லேயே எழுதச் சொல்லி அறிவுரைத் தந்தாரு.
சிவாஜி The Boss படத்துல ரஜினி சொல்லுவாரே "ஆதி என் கை ரொம்ப ராசியான கை" அந்தமாதிரி நண்பர் மகேஷோட கையும் இப்பொ வெற்றிகரமா எழுதிகிட்டிருக்க பலருக்கு ப்ளாக் ஆரம்பிச்சுத் தந்த ராசியான கை.
ரவிக்குமார் சார்:  இவர பத்தி சொல்லணும்னா ஏற்கனவே இவரு பொக்கிஷம் அப்படின்னு சொல்லிருந்தேன். அத்தோட அவரு நடத்திக்கிட்டு இருக்க வாசிப்போம் இணைய நூலகம் எனக்கெல்லாம் கெடச்ச மிகப் பெரிய புதையல்.
என்னைப் போன்ற பார்வையற்றவர்கள் தடையில்லாம படிக்கணும்ங்கிறதுக்காக ஒரு ப்ளாகாக ஆரம்பிச்சி, அதயே ஒரு அழகான இணையதளம் அளவிற்கு மாத்தி,  சிறப்பான தரமான நூல்களோட ஒரு பக்கா நூலகத்த நடத்திக்கிட்டு இருக்காரு.
உள்ளூர் எழுத்தாளர்கள் முதல் உலக எழுத்தாளர்கள் வரை, பழமை இலக்கியம் முதல் நவீன இலக்கியம் வரை தினம் தினம் புதுப் புது நூலறிமுகங்கள்,  நூல்விமர்சனங்கள். பல நூல்களைப் பற்றின சுவாரஸ்யமான தகவல்களத் தந்து எங்களப் படிக்கத் தூண்டிக்கிட்டே இருப்பாரு.
தன்னால் முடிந்தவரை புத்தகங்களை நாங்களும் படிக்க கூடியவகையில் accessible formatல் கொண்டுவரும் உன்னத முயற்சி & உழைப்பில் தன்னை ஈடுபடுத்திக் கொண்டிருக்கும் தன்னலமற்ற தனித்துவ மனிதர்.
இதோ! இதை நான் எழுதி கொண்டிருக்கும் இந்தநேரத்தில், இதை நீங்கள் படித்து கொண்டிருக்கிற இந்த நேரத்தில் நிச்சயமாக ஏதாவது ஒரு நூலை நாங்கள் படிக்கக் கூடியவகையில் மின்புத்தகமாக (E-book)  உருவாக்கிக் கொண்டிருப்பார்.
வரும்காலங்களில் இன்னும் விரிவாகப் பேசுவோம்.
மேற்கூறிய அம்சங்கள் என்னை ஒரு நல்ல வாசகனாக வளர்த்துக் கொண்டிருக்க,
நல்ல நல்ல வாசகர்கள், நண்பர்கள், ஆன்றோர்கள் மற்றும் சான்றோர்களாகிய உங்கள் ஆதரவுடன் எழுத்துலகில் அடியெடுத்து வைக்கிறேன்.
உங்கல் வழிகாட்டுதல்களும் ஆலோசனைகளும் மிக மிக முக்கியம் & அவசியம்.
**********
இன்று பிறந்தநாள் காணும் என் செல்லத் தங்கைக்கு சமர்ப்பனம்.